[1]
Et Doz li Gris et li grans parantez,
Et Berneysonz qui ot le cuer iré[2]
Anvers R. de Cambrai la cité.
Mout se sont bien rangié et devisé.
Et l’ampereres et le riche barné
Ont d’autre part lor grant ost asanblé :
La veïst l’en maint gentil home armé
Sor les chevax corrans et abrivez.
Alemant ont le premier ost guié :
Si les conduist Thyorin le sené,
O lui Hermant son frere le puisné ;
Cil furent fils a Horri l’alosé[3]
Qui Alemaigne tint quite en herité.
Avec elz sont .c. chevalier armé ;
N’i ot celui n’eüst helme gemé,
L’espée çainte et l’escu acolé,
Et fort destrier, auferrant sejorné.
Après l’eschiele que font li Alemant,
S’en vont armer Hanris et Guinemant :
Cil furent filz a Gerart le vaillant,[4]
Celui de Liege que Gerins ama tant.
Ovec elz sont .c. chevalier poissant ;
N’i ot celui n’eüst helme luissant,
Et boen espié et espée tranchant,
Hauberc doublier et bon destrier corrant.
L’uns delez l’autre vont serré chevalchant.
La tierce eschiele firent li fil Guerré :
C’est Enjorren et Harvi l’alosé.[5]
Avec elz furent .c. chevalier armé,
- ↑ 422 Il faut sans doute lire Huedonz au lieu de Doonz, puisque ce personnage est nommé Doz li Gris au vers suivant.
- ↑ 424 Ms. Ber*.
- ↑ 434 Orri l’Allemand était fils d’une des sœurs, la troisième, du duc Garin de Metz.
- ↑ 442 Gérart de Liège, fils de la quatrième sœur du duc Garin.
- ↑ 450 Ms. Enlorten. La bonne leçon est indiquée dans ces deux vers du f. 264 c : Les fix Guerré a fait venir avant : | Hervi le preu et son frere Enjorrant.