torqueri ? Suscipit ille de lectulo, et imò cum gemitu populum sic adorat : Malis novæ nuptæ peremptus artibus, et addictus noxio poculo, torum tepentem adultero mancipavi.
Tunc uxor egregia capit præsentem audaciam, et mente sacrilega coarguenti marito resistens altercat. Populus æstuat, diversa tendentes, hi pessimam feminam viventem statim cum corpore mariti sepeliendam : alii, mendacio cadaveris fidem non habendam. Sed hanc cunctationem sequens adolescentis sermo distinxit. Nam rursus altius ingemescens, dabo, inquit, dabo vobis intemeratæ veritatis documenta perlucida, et quod prorsus alius nemo cognoverit, indicabo. Tunc digito me demonstrans : Nam cùm corporis mei custos hic sagacissimus, exertam mihi teneret vigiliam ; cantatrices anus, exuviis meis imminentes, atque ob id reformatæ frustrà sæpiùs, cum industriam ejus sedulam fallere nequissent : postremum injecta somni nebula, eoque in profundam quietem sepulto, me nomine ciere non prius desierunt, quàm dum hebetes artus et membra frigida pigris conatibus ad artis
