Priusque apparatu solito instruit feralem officinam, omne genus aromatis, et ignorabiliter laminis literatis, et infelicium avium durantibus calvis defletorum, sepultorum etiam cadaverum expositis multis admodum membris, hîc nares et digiti illic carnosi clavi pendentium ; alibi trucidatorum servatus cruor, et extorta dentibus ferarum trunca calvaria. Tunc decantatis spirantibus fibris, litat vario latice, nunc rore fontano, nunc lacte vaccino, nunc melle montano, libat et mulsa. Sic illos capillos in mutuos nexus obditos, atque nodatos, cum multis odoribus dat vivis carbonibus adolendos. Tunc protinus inexpugnabili magicæ disciplinæ potestate, et cæca numinum coactorum violentia, illa corpora quorum fumabant stridentes capilli, spiritum mutuantur humanum, et sentiunt, et audiunt, et ambulant : et, qua nidor suarum ducebat exuviarum, veniunt ; et, pro illo juvene Bœotio aditum gestientes, fores insiliunt. Cum ecce crapula madens, et improvidæ noctis deceptus caligine audacter mucrone destricto, in insani modum Ajacis armatus, non ut ille vivis pecoribus infestus, tota laniavit armenta ; sed longè fortius, qui tres inflatos caprinos utres exanimasti : ut ego te prostratis hostibus sine maculâ san-
