Magni Jovis germana et conjuga : sive tu Sami, quæ querulo partu vagituque et alimonia tua gloriatur, tenes vetusta delubra ; sive celsæ Carthaginis, quæ te virginem vectura leonis cœlo commeantem percolit, beatas sedes frequentas : sive prope ripas Inachi, qui te jàm nuptam Tonantis, et reginam Dearum memorat, inclytis Argivorum præsides mœnibus : quam cunctus oriens Zygiam veneratur, et omnis occidens Lucinam appellat : sis meis extremis casibus Juno Sospita, meque in tantis exantlatis laboribus defessam, imminentis periculi metu libera, quod sciam, soles prægnantibus periclitantibus ultrò subvenire.
Ad istum modum supplicanti statim sese Juno cùm totius sui numinis augusta dignitate præsentat, et protinus, quàm vellem, inquit, Psyche, nutum meum precibus tuis accommodare : sed contrà voluntatem
