totisque vacuefacto præcordiis, per mediam alvum nudam virginem, quam prætulit nobis, insuere ; ut sola facie prominente, cæterum corpus puellæ nexu ferino coërceat ; tunc super aliquod saxum scruposum, insuticium et fartilem asinum exponere, et solis ardentis vaporibus tradere, sic enim cuncta ; quæ rectè statuistis, ambo sustinebunt : et mortem asinus, quam pridem meruit, et illa morsus ferarum, cùm vermibus membra laniabuntur ; et ignis flagrantiam, cùm sol nimiis caloribus inflammarit uterùm ; et patibuli cruciatum, cùm canes et vultures intima protrahent viscera. Sed et cæteras ejus ærumnas et tormenta numerate. Mortuæ bestiæ ipsa vivens ventrem habitabit ; tùm fœtore nimio nares æstuabunt : inediæ diutinæ letali fame tabescet ; nec suis saltem liberis manibus mortem sibi fabricare poterit. Talibus dictis, non pedibus, sed totis animis latrones in ejus vadunt sententiam. Quam meis tàm magnis auribus accipiens, quid aliud quàm meum crastinum deflebam cadaver ?
Page:Apulée - Les Métamorphoses, Bastien, 1787, I.djvu/545
Le texte de cette page a été corrigé et est conforme au fac-similé.
