etiam satis quidem tenuis et ipsa, verumtamen postrema lascivia famigerabilis. Sed die quâdam, dùm matutinò ille ad opus susceptum proficiscitur, statim latenter irrepit ejus hospitium temerarius adulter. Ac, dum Veneris colluctationibus securius operantur ; maritus ignarus rerum, ac nihil etiamnunc tale suspicans, improvisus hospitium repetit. Jàmque clausis et obseratis foribus, uxoris laudata continentia, januam pulsat, sibilo etiam præsentiam suam denuntiante. Tunc mulier callida, et ad hujusmodi flagitia perastutula, tenacissimis amplexibus expeditum hominem, dolio, quod erat in angulo semiobrutum, sed aliàs vacuum, dissimulanter abscondit : et patefactis ædibus, adhuc introeuntem maritum aspero sermone accipit : siccine, vacuus et otiosus, insinuatis manibus ambulabis mihi, nec, obito consueto labore, vitæ nostræ prospicies, et aliquid cibatui parabis ? at ego misera et per noctem et per diem lanificio nervos meos contorqueo, ut intrà cellulam nostram saltem lucerna luceat. Quanto me felicior Daphne vicina, quæ mero et prandio matutino satiata, cum suis adulteris voluptatur !
