publici spectaculi depudescerem. Sed privatus humana manu, privatus digitis, ungula rotunda atque mutila gladium stringere nequaquam poteram. Planè ut potui, tenui specula solabar clades ultimas ; quòd ver in ipso ortu jàm gemmulis floridis cuncta depingeret, et jàm purpureo nitore prata vestiret : et commodùm dirupto spineo tegmine, spirantes cinnameos odores, promicarent rosæ, quæ priori me Lucio redderent.
Dies ecce muneri destinatus aderat, ad conseptum caveæ, prosequente populo, pompatico favore deducor. Ac dùm ludicris scenicorum choreis primitiæ spectaculi dedicantur : tantisper ante portam constitutus, pabulum lætissimi graminis, quod in ipso germinabat aditu, libens affectabam : subinde curiosos oculos, patente porta, spectaculi prospectu gratissimo reficiens. Nàm puelli puellæque virenti florentes ætatula, forma conspicui, veste nitidi, incessu gestuosi, Græcanicam saltantes pyrrhicam, dispositis ordinationibus decoros ambitus inerrabant : nunc in orbe rotatim flexuosi, nunc in obliquam seriem connexi : et in quadratum patorem cuneati : et in catervæ dissidium separati. Ad ubi discursus reciproci multimodas ambages tubæ terminalis cantus explicuit :
