PROLOGUE
Veni ad liberandum nos.
Domine Deus virtutum !
Pour l’offense du premier pere
que tout le gendre humain compere
en servitude très grevaine.
Volt le fils de Dieu par mistere
couvrir sa divinité clere
du voille de nature humaine,
Quand de la majesté haultaine
en la povre vie mondaine
vint pour devenir nostre frere,
Ou sa personne d’honneur plaine
soubmist a traveil et a paine
et en fin a mort tres amere.
Long temps fut humaine nature
soubmise a trop dure pointure
de puis celluy transgrès commis,
Car l’essence qui toujours dure
et en qui n’a fin ne mesure
avoit cest edit ainsi mis
Que mesmes ses meilleurs amis
en tenebres feussent soubmis
sans terme de gloire conclure,
Et fut tel discort entremis,
qu’il ne pooit estre demis
par angle n’aultre creature.
Quant a ce discort subvenir
remede ne pooit venir
si non de Dieu tant seulement :
Homme n’y pooit advenir,
pechié l’en avoit fait banir
et forclorre totallement ;
L’angle n’y pooit bonnement
pour le vice qu’aucunement
infiny se voulait tenir,
En tant que son deriglement
s’estoit adressé plainement
contre cil qui ne peust fenir.
Et ainsi durant ceste guerre
a qui Justice tenoit serre
humanité trop se douloit,
Car pour supplier ne requerre
ne pooit avoir ne acquerre
félicité qu’elle vouloit ;
Le supplier ne luy talloit.
Misericorde lui falloit,
qu’aultre aide n’avait en terre.
Et se quelque espoir lui bailloit,
rigueur de Justice y sailloit :
s’en estoit privée grant erre.
Ainsi tous humains descendoient
- ↑ 1 Les mss portent ces mots : Cy commence le prologue du premier livre de la passion.
- ↑ 4 Quencor tout le gendre B. C.
- ↑ 9 de manque A.
- ↑ 19 nest B. C.
- ↑ 22 tenbres A.
- ↑ 31 pechie luy ot fait forbanir B. C. le pechie A.
- ↑ 32 et indigne B. C.
- ↑ 38 pouoit B. C. contre dieu A.
- ↑ 43 scauoit B. C.
- ↑ 47 quant a ce riens navoit en terre B. C.
- ↑ 51 se rendoient B. C.
