en s’apprenant le beau bréviaire d’amour. Il s’interroguoyt à
respondre à tous cas eschéans. Et, le lendemain, si, vers Complies, il rencontroyt quelqu’une desdictes princesses en bon poinct, vautrée en sa lictière, escortée de ses paiges bien armez, et fière, il demeuroyt béant, comme chien attrapant musches, à veoir ceste frisque figure qui le brusloyt d’autant.
Le secrétaire de Monseigneur, gentilhomme périgourdin, luy ayant apertement démonstré que les pères, procureurs et auditeurs de rote, acheptoyent par force présens, non relicques ou indulgences, mais bien pierreries et or, la faveur d’estre familiers chez les plus haultes de ces chattes choyées qui vivoyent sous la protection des seigneurs du Concile, alors le paouvre Tourangeau, tout nice et cocquebin qu’il estoyt, thezaurisoyt dans sa paillasse les angelotz à luy donnez par le bon archevesque pour travaulx d’escripture, espérant, un iour, en avoir suffisamment, à ceste fin de veoir un petit la courtizane d’ung cardinal, se fiant à Dieu pour le reste. Il estoyt deschaussé de la cervelle jusqu’aux talons, et ressembloyt autant à ung homme qu’une chièvre coëffée de
nuict ressemble à une damoiselle ; mais, bridé par son envie, il alloyt le soir par les rues de Constance, peu soulcieux de sa vie ; et, au risque de se faire pertuysanner le corps par les souldards, il espionnoyt les cardinaulx
entrant chez les leurs.
Lors il voyoyt les chandelles de cire s’allumant aussytost ez maisons ; et soubdain reluisoyent les huys et les croisées. Puis il entendoyt les benoists abbez ou aultres se rigolant, beuvant, prenant du meilleur, énamourez, chantant l’Alleluia secret, et donnant de menus suffraiges à la musicque dont on les resgalloyt. Les cuisines faisoyent des miracles, et si dysoyt-on des Offices de bonnes pottées grasses
