et fluantes, Matines de iambonneaux, Vespres de goulées friandes et Laudes de sucreries. Et, après les beuvettes, ores, ces braves prebstres se taisoyent. Leurs paiges iouoyent aux dez sur les degrez, et les mules restives se battoyent dans la rue. Tout alloyt bien ! Mais, aussy, il y avoyt de la foy et de la religion. Voilà comment le bonhomme Hus feut bruslé ! Et la cause ? Il mettoyt la main dans le plat, sans en estre prié. Et doncques pourquoy estoyt-il huguenot avant les aultres ?
Pour en revenir au petit gentil Philippe, souventes foys il receut force horions et attrapa de bons coups ; mais le diable le soustenoyt, en l’incitant à croire que, tost ou tard, il auroyt son tour d’estre cardinal chez quelque femme d’ung. Sa convoitise lui donna de la hardiesse comme à ung cerf en automne, et si, qu’il se glissa ung soir dans la plus belle maison de Constance, au montoir, d’où il avoyt souvent veu des officiers, senneschaulx, varlets et paiges attendant, avecques des flambeaux, leurs maistres, ducs, roys, cardinaulx et archevesques.
— Ah ! se dit-il, elle doibt estre belle et guallante, celle-là !…
Ung souldard, bien armé, le laissa passer, cuidant qu’il appartenoyt à l’électeur de Bavière, sortant présentement dudict logiz, et qu’il alloyt s’y acquitter d’un messaige de ce dessusdict seigneur. Philippe de Mala monta les degrez aussi lestement que lévrier possédé de male raige d’amour, et feut mené par une délectable odeur de parfums iouxte la chambre où devisoyt avecques ses femmes la maistresse du logiz en désagraphant ses atours. Il resta tout esbahy, comme ung voleur devant les sergens. La dame estoyt sans cotte ni chapperon. Les chamberières et les meschines, occupées à la deschausser et déshabiller, mettoyent son ioly corps à nud si dextrement et franchement, que le prebstre esmérillonné feit un Ah ! qui sentoyt l’amour.
— Et que voulez-vous, mon petit ? lui dit la dame.
— Vous rendre mon âme, feit-il en la mangeant des yeulx.
— Vous pouvez revenir demain, reprint-elle pour se druement gausser de luy.
A quoy Philippe, tout bordé de cramoisy, respondit gentement :
— Ie n’y fauldray.
Elle se print à rire comme une folle. Le Philippe, interdict, resta pantois et tout aise, arrestant sur elle des yeulx qui cupidonnoyent d’admirables mignardises d’amour : comme beaulx cheveulx espars sur son dos ayant poly d’ivoire, et monstrant des
