Page:Bartsch - La Langue et la littérature françaises depuis le IXe siècle jusqu'au XIVe siècle, 1887.djvu/79

hi sanct Lethgier, li Evvrui ;
cio confortent ad ambes duos
que s’ent ralgent in lor honors.
Et sancz Lethgiers den fistdra bien,
que s’en ralat en s’evesquet ;
et Evvruins den fisdra miel,
que donc deveng anatemaz ;
son queu que il a coronet
toth lo laisera recimer.
Domine deu in cio laissat
et a diable-s comandat.
qui donc fud miels et a lui vint,
il voluntiers semper reciut.
cum fulc en aut grand adunat,
lo regne prest a devastar.
À foc, a flamma vai ardant
et a gladies persecutan ;
por quant il pot tan fai de miel,
por deu nel volt il observer.
ciel ne fud nez de medre vivs
qui tal exercite vidist.
Ad Ostedun, a cilla ciu,
dom sanct Lethgier vai asalir.
ne pot intrer en la ciutat ;
defors l’asist, fist 1 gran miel,
et sancz Lethgiers mul en fud trist
por ciel tiel miel que defors vid.
Sos clerjes pres et revestit
et ob ses croix fors s’en exit.
por o n’exit, vol li preier
que tot ciel miel laisses por deu.
ciel Evvruins, qual horal vid,
penrel rovat, lier lo fist.
Hor’en aurez las poenas granz
que il en fisdra li tiranz.
li perfides tam fud cruels,
lis ols del cap li fai crever.
cum si l’aut fait mis l’en reclus :
ne soth nuls om qu’es devenguz.
Ambas lavvras li fai talier,
hanc la lingua que aut in queu.
cum si l’aut toth vituperet,
dist Evvruins, qui tan fud miels,
’hor’a perdud dom deu parlier,
ja non podra mais deu laudier.’A terra joth, mult fo afflicz,
non oct ob se cui en calsist.
super lis piez ne pod ester,
que toz los at il condemnets.
or’a perdud don deu parlier,
ja non podra mais deu laudier.
Hed 11 non ad lingu’a parlier,
deus exaudis lis sos pensez ;
et si el non ad ols carnels,
encor los ad espiritiels ;
et si en corps a grand torment,
l’anima n’auura consolament.
Guenes oth num cuil comandat ;
la jus en cartres l’en menat,
et en Fescant in ciel monstier
illo reclusdrent sanct Lethgier.
dominedeus in ciel flaiel
1 visitet Lethgier son servv.
La labia li restaurat :
si cum desanz deu pres laudier.
et hanc en aut merci si grand,
parlier lo fist si cum desanz.
donc pres Lethgiers a predier,
poble ben fist credre in deu.
Et Evvruis, cum il l’audit,
credre nel pot antro quel vid.
cum il lo vid, fud corroptios ;
donc oct ab lui dures raizons ;
el cor exasprat al tirant,
peis li promest ad en avant.
À grand furor, a gran flaiel
sil recomanda Laudebert.
cio li rova et noit et di
miel li fesist dentro qu’’el viu.
ciel Laudebert fura buons om,
et sancz Lethgiers duis a son dom.