gardes, que Mr de Grillon avoit remis en ses mains, ce que le roy ne vouloit plus permettre ; joint aussy que les dames nous trouvoint a dire a la court, on fit office envers la reine pour faire nostre accord avesques le roy, et nous y faire revenir ; ce qu’elle obtint : et quelque temps apres que le roy eut esté nous y voyant sans nous parler, il s’en ennuya, et vescut avesques nous comme auparavant.
Lors Mr de Crequy prit possession du regiment des gardes, et moy je m’en vins aux bains de Plumieres[1] pour ma cuisse, et emmenay avesques moy bonne compagnie de la court outre mes gentilshommes, comme Bellot, Charmeil, Messillac, et le baron de Neufvi. J’avois avesques moy la bande de violons d’Avignon, que La Pierre commande : j’avois une espece de musique, et tous les divertissements qu’un jeune homme riche, desbauché, et mauvais mesnager, pouvoit desirer. Ma sœur de Saint-Luc estoit venue en Lorraine voir nostre mere ; mon frere y estoit aussy, et la jeunesse de Lorraine m’accompagnoit toujours. Nous menames une douce vie a Plumieres, ou je me gueris entierement (juin). J’y estois amoureux d’une dame de Remiremont, Bourguignonne, nommée madame de Fussé (juillet). En fin je ne m’y ennuyai point durant trois mois que j’y sejournay.
Aust. — J’en partis sur ce que l’on me manda que le roy alloit en Limousin avesques quelque espece d’armée, et que peut estre y auroit il guerre[2]. Ma
