Page:Bassompierre - Journal de ma vie, 2.djvu/324

La bibliothèque libre.
Aller à la navigation Aller à la recherche
Le texte de cette page a été corrigé et est conforme au fac-similé.
320
journal de ma vie.

elle esteignit la plus part des mesches des soldats quy devoint donner, lesquels se presenterent bravement, et quelques gentilshommes aussy, et furent un peu dans le lieu ou la mine avoit joué, ne pouvant monter plus avant a cause qu’elle avoit escarpé la terre. Mais tost apres les ennemis parurent au dessus et aux flancs, jettans pots a feu, grenades et cercles[1] sur nos gens, et tirans incessamment sur eux : La Mayson quy y devoit commander, fut tué d’abbord, et deux sergens. Mrs de Chaunes et de Pralain estoint a l’entrée et resfraichissoint continuellement de gens. Ce fut la premiere fois que je vis Mr Frangipani faire sa charge qu’il executoit avesques grand jugement et hardiesse, et fit ce jour là fort bien son devoir.

En mesme temps les ennemis firent une sortie sur les deux compagnies des gardes quy estoint au bout de la ligne quy fermoit nostre main gauche. Messieurs les mareschaux me commanderent d’y aller, et trente gentilshommes me suyvirent, quy firent des merveilles ce soir là, et puis dire qu’en un grand embarras comme fut celuy là, la noblesse y va tout autrement que les simples soldats. J’arrivay aux gardes comme les ennemis marchoint a eux ; je les trouvay sur leurs armes en bon ordre pour les soustenir. Les deux capitaines Castelnaut[2] et Meux[3] furent fort ayses de

  1. Cercles à feu.
  2. Mathurin de Castelnau, seigneur du Rouvre, capitaine au régiment des gardes, second fils de Pierre de Castelnau, seigneur de la Mauvissière, et de Marguerite de Sigonneau, sa seconde femme, mourut au siége de Montpellier en 1622.
  3. Jean de Rouville, seigneur de Meux, fils de Jacques de Rouville, seigneur de Meux, et de Denise Bochart.