Durant la bonne reception que l’on luy faisoit, les brigues de la court croissoint : Mr le Prince estoit en grande autorité et tous les grans estoint de sa cabale et ses partisans ; Mrs de Guyse[1] mesmes s’estoint mis de son costé sous le pretexte du mescontentement que chascun avoit du mareschal d’Ancres et de sa femme, lequel neammoins eut l’asseurance de se venir tenir a son logis du faubourg Saint Germains : vray est que c’estoit sur l’asseurance que Mr le Prince luy avoit donnée de le maintenir.
Il fit en ce temps la aussy un tour bien hardy : le jour que Mr le Prince faisoit son festin au millord de Hay, que tous les grans de la court (quy estoint ses ennemis jurés) y estoint conviés, il vint avec trente gentilshommes trouver Mr le Prince dans la salle mesme du festin ou ils estoint tous, et apres luy avoir parlé assés longtemps, il print congé de luy et s’en retourna a son logis, tous ces messieurs le morguans, et luy eux aussy. Ils mirent forces propos en avant de le tuer lors, mais ce fut sans effet. Le lendemain Mr le Prince l’envoya querir et luy dit qu’il avoit eu beaucoup de peine de contenir ces princes et seigneurs le jour precedent, quy le vouloint attaquer, et qu’ils l’avoint tous menacés de l’abandonner s’il ne quittoit sa protection : c’est pourquoy il luy desclaroit qu’il ne le pouvoit plus maintenir et qu’il luy conseilloit de se retirer en Normandie ou il estoit lieutenant general[2] ; ce qu’entendu par luy, il vint au Louvre prendre congé
