reine parla a ces messieurs, et comme je luy eus demandé par quy elle feroit prendre Mr le Prince, elle me dit : « J’y ay pourveu. »
Mr le Prince vint sur les huit heures au conseil, et la reine regardant comme tout le monde luy donnoit les placets, elle dit : « Voyla maintenant le roy de France ; mais sa royauté sera comme celle de la feve, elle ne durera pas longtemps. »
Sur cela la reine nous envoya a la porte du Louvre, Mr de Crequy et moy, pour faire prendre les armes aux gardes, ce que nous fismes, et ce pendant elle envoya querir Mr le Prince. Elle nous envoya dire a Mr de Crequy et a moy que sy Mr le Prince venoit a la porte, que nous l’arrestassions : nous luy mandasmes que c’estoit un sy grand commandement qu’il meritoit bien nous estre fait de bouche, et que la reine nous l’eut dit estant en sa chambre ; que s’il luy plaisoit d’envoyer un lieutenant des gardes[1] pour s’en saisir, que nous luy donnerions main forte : et cependant je luy manday que personne ne sortiroit de la porte, ou je mis trente hallebardiers suisses pendant que Mr de Crequy donnoit son ordre aux François.
Il vint incontinent apres un vallet de chambre de la reine nous dire de sa part que Mr le Prince estoit pris, et que sy les autres trois venoint, nous ne les laissions pas retourner. Nous luy mandasmes que pourveu qu’ils y vinssent, que nous luy en respondions : mais ils furent plus habiles. Elle envoya Saint Geran pour
- ↑ Des gardes du corps.
