tion qu’il avoit faitte, et en mesme temps pointerent quelques pieces sur Mr d’Espernon quy estoit avancé, et sur sa trouppe. Saint Surin bien estonné de ce subit changement, dit a Mr d’Espernon qu’il ne venoit point de sa part ; qu’il feroit reparer cette faute, et qu’il ne retourneroit plus avesques eux, en cas qu’ils ne se soumissent a l’obeissance du roy. Il voulut rentrer dans la place ; mais on luy dit de dessus les murailles forces injures, ce quy le fit retourner avec Mr d’Espernon quy avoit mandé au roy l’espoir qu’il avoit de remettre Royan en son obeissance, et le roy receut cette premiere nouvelle a Saint Jean d’Angeli ou il arriva le jeudy 28me[1], quy estoit le jour mesme que le traitté de Royan se rompit, et le lendemain 29me, comme le roy arriva a Saintes, il en sceut la nouvelle.
Il sejourna a Saintes le samedy, dimanche (may) et lundy suyvant, tant pour faire avancer son armée que pour donner audience aux ambassadeurs des cantons [protestans][2] de Suisse quy l’estoint venus trouver pour interceder pour les huguenots de la France. Je leur fis festin, puis les menay a l’audience en laquelle ils eurent pour response du roy que quand les huguenots, ses sujets rebelles, rentreroint en leur devoir, il auroit les bras de sa clemence ouverts pour les recevoir, et les renvoya de Saintes en hors, d’ou il partit le mardy 3me de may pour venir coucher a
