plus qu’a eux que, des que le coup est donné, il n’y a plus de peril, ce quy me fit d’abbord jetter les yeux sur la contenance d’un chascun et voir quel effet ce coup auroit fait en eux : je n’en apperceus pas un quy fit aucun sinne d’estonnement, non pas mesme d’y prendre quasy garde ; un autre tua parmy eux un gentilhomme de Mr de Crequy, dont ils ne firent aucun semblant. J’eus en marchant a la barricade un de mes gardes tué sur lequel j'estois appuyé : un autre poursuyvant chaudement avec les enfans perdus fut tué sur le pont de Suse : un gentilhomme des miens y eut une mousquetade sur le cou du pié, dont il est demeuré estropié ; c’estoit celuy quy commandoit ma galiotte a la Rochelle, nommé Du Val[1]. Aucuns de nos enfans perdus entrerent mesmes dans la ville pesle mesle avec les ennemis et y furent pris prisonniers, et nous eussions a l'heure mesme forcé Suse sy nous n’eussions fait retirer nos gens parce que nous voulions conserver la ville sans la piller, pour servir de logement au roy.
Peu apres estre venus sur ce tertre, Mr de Crequy avec Mr de la Vallette allerent loger a gauche en des maisons sur la descente avesques les gardes, et moy avec Toiras et Tavannes primes a la droitte en descendant et y logeames Navarre. Le commandeur quoyque blessé alla mettre les Suisses de l’autre costé de la ville affin d’empescher que rien n’en sortit ; quoy fait, Mr de Crequy et moy, primes nostre logement aux
- ↑ Pierre du Val, seigneur de Massiot, fils de Jacques du Val, seigneur de Cussey, et de Madeleine de Contay, fut attaché au maréchal de Bassompierre jusqu’à sa disgrâce. Il avait été aide de camp du roi et gentilhomme ordinaire de sa chambre.
