paille, il voirra decliner les conduicts a costé contrebas, & se eslargir quelque peu au dedens, & finablement parvenir aux os pierreux, & entrer dedens le test. Les conduicts pour odorer, quelque diligence qu’on sache faire, ne sont apparoissants sinon es petits, nouvellement naiz, comme d’un mois ou de deux mois. Car commenceants a devenir grands. Ils perdent cela. On les voit aussi en ceuls qu’on a tiré de la matrice, lesquels ont des petits poils blancs comme barbeaux, de chasque costé de la partie de dessus la machouere d’en hault, mais ils sõt durs, lesquels trenches a la racine, & suyvis avec le cousteau, sont veus se inserer es extremitez de certains nerfs esquels ils se terminent. Touts les autres poissons ont des ouyes, qui sont ouvertures par les deux costez. Mais le Daulphin n’en ha point. Car comme nature luy ha nyé cela, elle luy ha baillé une fluste, au cõduict dessus la teste, droictement entre les deux yeulx, par laquelle fluste ou tuyau il respire & aspire en l’air, & iecte l’eau, & fait bruit. Le Daulphin est espois par le milieu au travers du corps a la maniere d’un retournouer de guantier, car il se termine de chasque costé en se agreslisant & diminuant en agu, tant de la partie de la teste que de la queue, il ha le nez long, rond, & droict, son dos est de couleur plombee tirant sur le noir. Il est blãc par dessoubs le ventre. Les aisles qu’il ha de chasque coste & sa queue, & l’arreste de dessus son dos sont moult noires. Ses dẽts sont de compte faict cent soixante en tout, moult poinctues & rondes, en longueur disposees par ordre, quarante en chasque costé de la maschouere : desquelles celles qui sont de la partie d’embas, sont plus petites que celles qui sont en la maschouere d’en hault, laquelle maschouere est continuee d’un seul os. Si est ce qu’il y ha bien apparoissance de quelque petite separation. Mais par dedens elle monstre estre d’un seul os a la maniere de celle d’un Crocodille, en laquelle les quatre vingts dents qui y sont, descendent iustement & se rencontrent en se inserant dedens les autres de la maschouere d’en bas. Il ha quasi la langue a delivre, comme est celle d’un porceau : mais elle est en ce differẽte, qu’elle est couchee au bord par le devãt, a la maniere des lãgues des Cygnes, Oies, ou autres oyseaux de riviere.
