Eſt-ce pas choſe digne de riſée de faire telles propoſitions, il falloit auoir veu, obſerué, recogneu & experimenté. Et s’ils l’auoient fait, Ils auroient dit pluſieurs choſes ſur ce ſubiect deſquelles ils ne parlent point.
Ils diſent en troiſieſme lieu, que les memoires qu’ils en ont leur a apris, mais les particularitez qu’ils rapportent de céte multitude de Montagnes, (ſi promptemẽt courues) & l’adjouſtement des enſeignemẽts qui leur en ont eſté donnez, iuſtifient clairement qu’ils n’en ont aucune pratique, puis qu’ils ne parlent pas dans les termes de l’Art.
Ie laiſſe ſous ſilence, & comme choſe inutile leurs diſcours, pour perſuader ce trauail & ces belles obiections qui ſe font à deſſein.
Comme auſſi ces facilitez de parfaire leur entrepriſe, me contentant de dire là deſſus qu’ils parlent trop generalement, trop legerement, & trop hardiment, d’vn fait du tout importãt : mais ils ne diſent pas le pouuoir faire, & n’en donnent aucunes preuues, qui ſeroient neantmoins tres vtiles & neceſſaires pour les faire croire capables d’vne ſciẽce où la pratique & la cognoiſſãce leur defaut. Ie les conſeille charitablemẽt d’aller ſeruir les Officiers des Mines d’Hongrie, à Scheminis, & là faire leur apprentiſſage dans la Mine du Bibertollen, qui a huict cents toiſes de profondeur.
