Page:Blaise de Vigenère – Traité des Chiffres, 1587.pdf/6

TRAICTÉ

Or ceste parolle assistee de la raison est en nous, ce qu’en la divinité la premiere emanation eternelle, assavoir le verbe, ou la sapience, Quae ex ore altissimi provivit primogenita ante omnem creaturam, en l’Ecclesiastique 2 4. Double au reste ; l’une animee de vive voix, procedant de l’estomac par la langue, en mots articulez & distincts ; Et l’autre, assavoir l’escriture, qui fait l’office de la parolle, comme muette & taisible, separee à part hors de nous, dont la main en est l’instrument : Toutes deux servans d’exprimer les interieures conceptions de nostre ame, d’où depend le nœud & lien principal de la societé humaine ; qui ne se sçauroit conserver sans une police bien ordonnee ; ne la police s’establir sinon par le moien de la raison : laquelle, non obstant que dame & maistresse de toutes choses, sans le benefice de la parolle qui la jecte de puissance en action, ne pourroit sortir les effects, ains demeurroit comme inutilement ensevelie à par soy dans l’estomac des personnes. Mais encore l’une & l’autre que feroient elles sans le secours de l’escriture, leur commune coadjutrice, qui ne se peult restreindre d’aucunes bornes qu’elle ne s’extende par tout ? Peu de chose certes, selon qu’on peult voir ès sauvages des terres neufves, si barbares, incivils, bestiaux, estans privez de son usage. Cela nous est aucunement representé par la loy donnee de bouche au Prophete Moyse, & la loy escrite, qui est comme une ame de l’autre tenant lieu du corps : car la loy donnee de bouche, ce dient les sages Hebrieux en leur