peccatum luxurie, ut premittitur, committebat, subsequenterque illos interficiebat seu interfici faciebat.
Interrogatus per quem seu quos interficiebantur, respondet quod aliquando per ipsum Egidium, reum, manu sua propria, et aliquando per dictos de Sillé vel Henrietum, aut hunc testem, seu eorum aliquem aut aliquos, conjunctim vel divisim.
Interrogatus qualiter interficiebantur, respondet quod aliquando decollabantur seu decapitabantur, aliquando eorum gutura scindebantur, aliquando dimembrabantur, et aliquando rumpebantur colla eorum cum baculo ligneo ; eratque gladius, ad eorum occisionem precise ordinatus, vulgariter appellatus Braquemart.
Interrogatus si dictus Egidius de Rays semel tantum, vel pluries, ita ut premissum est, luxuriabatur cum dictis [pueris] et puellis, respondet quod semel tantum, vel bis ad plus, cum ipsorum quolibet.
Item, ulterius deposuit atque dixit quod dictus Egidius de Rays, quandoque luxuriam committebat cum dictis pueris et puellis, antequam aliqualiter lederentur, sed raro, aliquando et sepius post suspensionem predictam ante aliam lesionem, aliquando postquam eis insciderat seu inscindi fecerat venam colli aut gutur, sanguine effluente, seu alias ipsis letaliter lesis et languentibus in mortem, et postquam abcissa fuerant illis colla, quandiu calor remanebat in ipsis.
Item, deposuit et dixit quod dictus Egidius de Rays eodem modo luxuriabatur nephande cum puellis, sicut cum pueris, spreto et omisso eorum sexu, dicique audivit pluries ab ipso Egidio de Rays quod multo major erat sibi complacencia, ita luxuriando cum dictis puellis seu filiabus ut predictum est, quam ipsam luxuriam cum eis .......... debito exercendo.
Interrogatus quid de dictis pueris et puellis post eorum occisionem seu de eorum cadaveribus agebatur, respondet quod urebantur ac etiam eorum vestes.
Interrogatus quis exponebat ipsos igni, respondet quod iste testis et dictus Henrietus hoc sepius faciebant.
Interrogatus ubi comburebantur, respondet quod in camera dicti Egidii et sepe in portali dicti loci de Machecolio.
Interrogatus de modo combustionum ipsorum, respondet quod supra lignigeria, in camino dicte camere, ligna grossa, et supra ea corpora mortua, deindeque sicci faciculi ponebantur, et fiebat ignis magnus ; vestes vero paulatim supponebantur igni et elevabantur in ipso ut lenius arderent et ne fetor inde sentiretur.
Interrogatus ubi ponebantur cineres seu pulveres ipsorum, respondet quod aliquando in cloacis, aliquando in fossatis, galice es doves, et aliis latibulis, secundum diversitatem locorum.
