Le lendemain à ſon reueil il trouua cette qualité ſi honorable & ſi aduantageuſe qu’il ſe reſolut de garder ce ieuſne tres-eſtroictement. Sur ces entrefaites on l’inuite à vn feſtin d’Aȣtaerohi ; il y en a peu qui ſçachent chanter au gré de ce Demon ; cettui cy eſt vn des Maiſtres. Il ſe laiſſe enfin emporter, & y mangea ſi bien & y chanta auec telle contention, qu’il en ſortit la ceruelle en écharpe ; le voila en meſme temps la tortuë, ou pour mieux dire la marote à la main, en la ſaiſon la plus faſcheuſe de l’hyuer, en l’eſtat qu’il eſtoit ſorty du ventre de ſa mere, il court par les neiges, & chante nuict & iour ; le lendemain, c’eſtoit le vingt-huictieme de Ianuier, il alla au village d’ȣenrio, où on luy fit trois ou quatre feſtins pour ſa ſanté, & en retourna auſſi fol qu’il y eſtoit allé. Quelques Sauuages diſoient que nous eſtions cauſes de tout cela, mais les plus ſages remarquerent qu’il s’eſtoit mocqué lors qu’expliquant les Commandemens de Dieu, i’auois condamné l’Aȣtaerohi, & attribuerens ſa folie à vne punition diuine.
La nuict du trente-vn il ſongea qu’il luy falloit vn Canot, huict Caſtors, deux Rays, ſix vingts œufs de Mauue, vne Tortuë, &
