da, pour ſa gueriſon à vne douzaine d’Enchanteurs qui l’eſtoient venus voir, & laquelle ayant mis en ſon ſac de Petun, elle ſe remua là dedans, ordonna les banquets, & autres ceremonies de la danſe, à ce qu’ils cõtent. Certes, voila biẽ des ſornettes, & i’ay bien peur qu’il n’y ait quelque choſe de plus noir & de plus caché.
Chapitre VI.
De la police des Hurons, & de leur gouuernement.
E ne pretends pas icy mettre nos Sauuages en parallele auec les Chinois, Iaponnois, & autres Nations parfaitement ciuiliſées ; mais ſeulement les tirer de la condition des beſtes, ou l’opinion de quelques-vns les a reduits, leur donner rang parmy les hommes, & faire paroiſtre qu’il y a meſme parmy eux quelque eſpece de vie Politique & Ciuile. C’eſt déja beaucoup à mon aduis de dire qu’ils viuent aſſemblez dans des Villages, quelquefois iuſques à cinquante, ſoixante, & cent Cabanes, c’eſt à dire trois cens &
