Aenons, il pretendoit nous perſuader de tranſporter noſtre Cabane en ſon Village. Surquoy nous auons à loüer Dieu, de ce qu’il nous fait la grace d’eſtre aymez & recherchez dans le Pays ; c’eſt à qui nous aura en ſon Village : les Arendoronnon nous en ont ſouuent porté la parole, les Altignenonghac, & ceux du Village Oſſoſſané, que nous appellons la Rochelle, nous font encor plus d’inſtance : mais ſi nous auons égard aux importunitez, aſſeurément ce Capitaine l’emportera ; il y a plus de ſix mois qu’il ne nous donne aucun repos, quelque affaire du Pays qu’il nous raconte, il ne manque point d’en tirer expreſſement ou tacitement cette concluſion ; mais ſur tout à ce Printemps il a employé toute ſa Rhetorique pour nous faire dire le mot, & obtenir tout à fait noſtre conſentement. Allant donc vn iour à ȣenrio, pour aſſiſter vn de nos Chreſtiens malade à la mort, ie trouuay par le chemin vn Sauuage qui me venoit querir de la part d’Aenons ; ie l’allay voir apres auoir ſatisfait à noſtre malade, qui nous menoit particulierement. Il me fit ce diſçours : mais ie luy feray tort de le mettre icy, car ie ne luy donneray pas la grace qu’il auoit en la bou-
