croyance dans le Pays, & donner cours à la publication du ſainct Euangile. Nous auõs receu, & receuons tous les iours tant de faueurs du Ciel, que nous auons ſuiet d’eſperer encor celle-cy, ſi tant eſt que ce ſoit la gloire de Dieu.
Chapitre II.
Quel est le ſentiment des Hurons touchant la nature & l’eſtat de l’ame, tant en ceſte vie, qu’apres la mort.
’Eſt vn plaiſir de les entendre parler des ames, ou pour mieux dire, c’eſt vne choſe tout à fait digne de compaſſion, de voir des hommes raiſonnables auoir des ſentimens ſi bas, d’vne eſſence ſi noble, & qui porte des traicts ſi vifs de la Diuinité. Ils luy donnent diuers noms ſelon ſes diuers eſtats ou diuerſes operations. Entant qu’elle anime ſeulement le corps, & luy donne la vie, ils l’appellent Khiondhecȣi ; entant qu’elle eſt raiſonnable, oki andaérandi, ſemblable à vn demon, qui contrefait le demon : entant qu’elle penſe & delibere
