Page:Castets - La Chanson des quatre fils Aymon, 1909.djvu/1002

974

appendice

« Barons, dit Charlemaignes, conforter ne poons,
Mais puis qu’il est anssis que nous perdu l’avons.
Desormais en ales, votre conseil ferons. »
« Sire, ce a dit Guenes, à Dieu beneïçon. »
50Charles li emperere leva le singlaton
Por esgarder Lohier le vis et le menton.
Il estoit tout nerciz, sanglans jusqu’au talon.
« Damedex, se dit Charles qui estora le mont,
Qui nasqui de la Virge à Noel sens dolor
55Et soffrites en croix et mort et passion,
Si com c’est voir, biau pere, [tout ce] que [nous] disons,
Si receves vous l’ame de Lohier le baron
Et me faites vangence du duc Buef d’Aigremont. »
E Diex ! si fut il puis à grant destrucion
60Dont Charles fut blamez et de Dieu et don mont.
Atant e vos poignant un messaiges breton,
Là où voit Charlemaigne, si cria à haut ton :
« Empererez de France, novelle vous dirons
Que ja s’en va dus Aimez et ci fiz à bandon ;
65Ne t’oserent atendre, por voir le te dison. »
« Barons, ce dit li rois, iceux perdu avons,
Ja sont il dou lignaige au traïtor felon. »
A moutier .s. Nicol Lohier enfouit on,
Anoinz et embaumez fu bien li gentilz hons
70Grant dolor demenerent li chevaliers barons.
Charlemaigne le roi ne pot conforter hons.
L’emperere de France son grant duel demena
Por l’amor de Lohier que durement amma.
« Biax filz, ce dit li rois, quel dommaige ci a !
75Diex reçoive vostre ame quant son plaisir sera
Se je puis longue vivre, Bueve le comparra ;
Par nul homme vivant garantis n’an sera
Que il ne soit pendus, tel domaige fait m’a. »
Lohier fut mis en terre, demorée n’i a.
80L’emperere soupire, Naime le conforta.
« Sires, ce dit li dus, ne vous esmaiez ja.
Laissiez ester le duel, nul recouvrier n’i a ;
Et mandes vos grans os et de ça et de là,
Puis alez sur le duc que si meffait vous a :
85Abates Aigremont que ses peres ferma,
Li dus Girars dou Fraite qui tant vous guerroia ;
Et se le povez prandre, nul non vous deffendra
Que n’an faciez justice, telle c’on gardera. »