Là demainent grant duel li chevaliers baron.
Tel noise demenerentet telle plorison,
C’a paine li uns l’autre entendre i peüt on.
Or oies qu’avoit fait Regnaus li fiz Aymon.
Il a mendé son pere, si l’a mis à raison.
« Peres, ce dit Regnaus, comment esploiteron ?
Remenrons nous ici ou nous nous en fuirons ?
Je dout que Charlemaignes ne praigne à oquison
Par ce qu’il est nos oncles, de verté le scet on.
Par la foi que vous doi, ja n’an eschaperons ;
Nous en arons grant guerre et grant destrucion. »
« Bien puet estre, biax fiz, li dus Aimes respont.
Allons en an Dordonne, le chastel garnisson.
Bien sçai que l’emperere nous en menra tenson. »
« Par foi, ce dit Regnaus, de neant le doutons.
Donc vestirent haubers, lascent [au]mes reonz
Et sainent les espées à senestre giron
Et montent à cheval et lor escuz prins ont.
De Paris s’en issirent à tout .c. compaingnons.
Or les conduie Diex, vers Ardanne s’en vont.
S’adonc les tenist Charles, les meïst en prison,
Ne veïssent lour piez devent l’Assencion.
Or chevauchent li prince et par nuit et par jor,
Oncques ne s’aresterent desiques à Dordon.
Là descendi li dus et li filz à bandon
Qui mont firent de duel au riche roi Charlon.
Le chastel font garnir, sodoier mender font
Por l’empereür Charle, le roi de Mont-Loon.
Or vous lairai de ceux, de Charle vous diron :
Por l’amor de son fil mainne mont grant dolor.
« Vraiz Diex, dit l’emperere, com nous consillerons ?
Malement [m’a] bailliz li dus Bues d’Aigremont
Qui mon fil m’a ocit. Sire Diex, vengez nous. »
« Sil fera il, biau sire, li dus Naimes respont ;
Ja ne verres passer la première saison
Que nous irons sur lui à .cm. compaingnons ;
Ja de ses forteresses nulles ne li lairons
Et si ne puet estordre que nous ne le prenons. »
« Certes, mon biau doux sire, se a dit Guenelon,
Ci n’i avoit que moi, Berangiers et Oton,
N’an porra eschaper li traïtor felon,
Puis que vous le voudrois, que nous ne l’ocions. »
« Il est voir, aient [cil], ja n’aura garison. »
Page:Castets - La Chanson des quatre fils Aymon, 1909.djvu/1001
Le texte de cette page a été corrigé et est conforme au fac-similé.
973
appendice
