Moult fu grant la douleur par dedens Aigremont.
Le duc ont enfoui ou sarqueu à bandon.
Or vous lerron de cheus qui ont grant marison,
Si diron de Grifon et son fix Guenelon,
Qu’il [vindrent] à Paris où iert le roi Kallon ;
Trestout li ont conté la mortel traïson
Qu’il ont mort le duc Buef, le sire d’Aigremon.
Et quant Kalles l’oï, si haucha le menton.
« Bien avez fet, dist il, si m’aït S. Symon. »
Mez depuis en ot il moult grande marison
Que le bon duc Girart et de Nantueil Doon
En guerroierent Kalle à coite d’esperon.
Mes tant ala la chose, bonne pes i mist on.
Girars en estora .i. moustier bel et bon
En l’onneur de S. Pierre le nobile baron,
Kalles la Charité et Vergeloi [se]lon,
Et tres toute la perte restora roi Kallon,
Puis furent il ami, si com lisant trouvon ;
Mes parler n’en daignierent à Renaut le baron
N’à Richart n’à Guichart n’à Aalart le blon,
N’à Maugis lor cousin qui tant savoit poisson.
Kalles en fist que fol, puis en ot marison ;
Mes ne se donnoit garde de la destruction
Que il ot puis par eus et la confondoison.
Hui mez pourrez oïr une bone canchon ;
Onques meillor ne fu puis le temps Salemon,
Par le mien ensient, comme voirs vous diron.
Mes ichi n’en a plus du duc Buef d’Aigremont.
Que en chez bois feullus chantent li oiseillon
Et toute creature repaire à sa seison,
Que Kalles tint sa court à Paris sa maison,
Et acordé se fu au duc de Roussillon.
Nulle si riche court ne vit onques mes hom.
Tuit i furent venu duc et conte et baron ;
.xv. rois, .xxx. dus i ot le jour par non,
Et bien .lx. contes, en escript le trouvon.
Le jour porta couronne l’emperere Kallon
Et là i fu venu Renaut, le fix Aymon,
Aalart et Guichart et Richart le baron,
Et leur pere meïsme, sans nule aresteison.