Mon oncle m’oceïtes dont j’ai le cuer iré,
Et votre niés meïsmes mal a hui bufeté.
Cuidiez que ne m’en doit, emperere, peser ?
La mort Buef d’Aigremont vos vodrai demander,
Que vos m’en fetes droit, par le cors .S. Omer,
Ou se ce non, danz rois, il m’en devra peser.
Come Karles l’oï, si comence a runfler,
Les eulz a roeiller, les sorcilz a lever,
La soe lede chiere fist moult a redoter.
Mauves garçon puant en a Renaut clamé :
A pou que ne vous voiz de ma paume doner.
Come Renaus l’oï, prent soi à retorner
Et regarde ses freres que il devoit amer.
Bien connut lor corrages, color prist a muer.
De moult grant hardement se prist a dementer.
Il prent .I. eschaquier que moult pooit peser ;
Il voit ses anemiz entor lui aüner ;
Bertolai en feri canque il pot esmer,
Amont parmi le chief, que il ne pot durer ;
Le cervel li espant, les eulz li fet voler ;
De si haut com il fu l’a fet juz craventer :
L’ame s’en est alée dou vaillant bacheler.
Or est morz Bertolaiz, li nies roi Karlemaigne,
Et quant li rois le voit, si en a grant engaigne ;
Il escria ses homes a clere voiz hautaigne :
Baron, car l’ociez, por celui Deu demaine.
Ilec le volt tuer, ce fu chose certaine.
Si ami nel lessierent, qu’il avoit mis en paine.
Tant drap i ot rompu qui estoit fez de laine
E tant chevoil tiré de tot tant chevetaine ;
Tant chevalier navré, qui soit bel ne cui plagne.
La bataille fu forz de la fiere compaigne.
La pais si fu lessiée et li maux si engraigne.
Fuiant s’en va Renaus sor [Baiart] d’Alemagne.
Aalars et Guichars de sievre ne se fagne.
N’en partiront a tele, ainz auront moult grant pagne.
De Paris sont parti li .IIII. fil Aymon,
Et Karles les fet sevre a coite d’esperon.
Maint chevalier le sievent laciez les confanon.
Page:Castets - La Chanson des quatre fils Aymon, 1909.djvu/159
Cette page a été validée par deux contributeurs.
147
les quatre fils aymon
