Segnor, or escotez, que Dex vos beneïe,
Ce fu a Pentecoste que la rose est florie,
Que les herbes sont vers et la rose espanie :
Dus Aimes de Dordone ne s’i [a]tarja mie,
Il vint a la cort Karle, avec lui sa mesnie.
Il trova la cort plaine de riche baronie.
Ses freres a veüz, envers eus s’umelie,
Et cil si le besierent par moult grant segnorie.
Grant joie fet li duz, ne vos mentirai mie,
De la male voellance qui est orre abessie.
Karles [si] voit le duc, a haute voiz li crie :
Aymez, bien vegniez vous, par ma barbe florie.
Sire, ce dit li duz, ihesus vos beneïe,
Et il nous doint ensemble de mener bone vie,
Si que nos soions tuit em-pardurable vie.
Grant joie fet li rois a duc Ayme le ber.
Del faudestuel descent, sel corrut acoler
Et Renaut le sien fil que ne volt oublier.
Grant joie font le jor cist novel bacheler.
Karles demande l’eve, s’asiéent au disner.
Par les tables s’asiéent et li comte et li per.
S’il furent bien servi, ne l’estuet demander,
Et quant il ont mengié, si prenent a lever.
Mais apres cele joie covint a dœl torner.
Li damoisel vaillant si alerent joer.
Li un en vont as chamz a cheval behorder,
Renaus et Bertolaiz s’asieent per a per,
Niés estoit Karlemaigne, forment fist a loer.
Hé laz ! mar i asist, il l’en covint finer.
Il comencent entr’els durement a joer,
Mes tant dura li geuz, prenent a aïrer,
Quer li niés Karlemaigne lessa le pon aler :
Renaut, le fil Aymon, va tel buffe doner
Que les .II. eulz el chief li fist estenceler.
Come Renaus le vit, si comence a enfler.
Por l’amor Karlemaigne ne l’osa adeser.
Il s’en va a Karlon l’empereor clamer :
Sire, droiz emperere, je ne vos oz irer.
Vos m’adobastes primes, je ne le puis celer.
Page:Castets - La Chanson des quatre fils Aymon, 1909.djvu/158
Cette page a été validée par deux contributeurs.
146
les quatre fils aymon
