Page:Castets - La Chanson des quatre fils Aymon, 1909.djvu/180

La bibliothèque libre.
Cette page a été validée par deux contributeurs.
168
les quatre fils aymon

Ou il ala zazier, si chien sont descoup[l]é.
20.Entre lui et si hom, dont il i ont plenté,
.IIII. cers avoit pris, mont s’i sont deporté.
Dus Aymes s’en repere et o lui si privé ;
Ne set mot de si fil qui [ja] sont ostelé,
Asis dedenz Dordone enz el paleis listé.
25.Qand le cons le saura, le sens aura mué.
Richart et Aalart et Guichart le sené
Et Renaut le gentil qi tant a de bonté,
Cil s’asient ensemble qui mont se sont amé.
Mais encor n’estoit pas le mengier apresté.
30.Dame Aye ist de la zambre, l[i] us[1] fu desfermé,
Et si fil la regardent qui mont sont decharné.
Aalart, dist Guichart, avez-vous esgardé ?
Veez la nostre mere qui tant vous a amé ?
Frere, dist Aalart, vous dites verité.
35.Bel frere, alez encontre, se il vous vient a gré.
Contez no mesestance et nostre povreté.
Non fera, dist Renaut, ja ne sera pensé ;
Ains atendromes tant q’ele ait a nos parlé,
Savoir s’ele nos a de noient ravisé.
40.Or sont li .IIII. freres sus el paleis listé.
Tant furent nu et povre, n’i ont riens en dossier,
Si sont lai et hisdous, bien semblent aversier.
La duchouse les veoit, n’i out q’esmerveillier ;
Tiel poor out la damme, ne se sout conseillier ;
45.Talent out qu’en sa chambre s’en revoist emboschie
Mes el se raseüre, ses prist a reisonier :
Baron, dont estes vos, nobire cevalier ?
Bien resemblez hermite ou gent peneancier.
Se vos voullez de nostre, ja celer nel vos quier,
50.De dras et de vitaille dont vos aves mestier,
Vos en ferai je ja assez apareillier,
Por l’amor a cel sire qi tot a a baillier,
Qui garisse mi fil de mort e d’e[n]gombrier,
Je nes vi, [de mes iex][2] .X. ans out en fevrier.

  1. Corrigé d’après L.
  2. Illisible, complété d’après B.