Tuit i furent venu si prince et si chassé.
Maint chevalier i ot que li rois ot mandé,
.XX archeveske furent et bien .CC. abé.
Girars de Rossillon cil fu à cort alés
Et Aymes de Dordon, li vasaus alosés,
Ki .IIII. flux avoit de grant nobilité.
Li dus si vint à cort avec l’autre barné,
Mais Doons de Nantueil qui ot le poil meslé,
Cil n’i daigna venir par sa grant cruelté,
Car Charles l’empereres l’avoit cueilli en hé,
Ne li dus d’Aigremont qui tant avoit bonté.
Li barnages fu grant ki là fu aüné,
Onques mais itel coust l’emperere membré
Ne mist à cort n’à feste, con le jor a mené.
Li baron se deduient el palais principel
Et jeuent as esches li vasal aduré ;
Grant joie et grant deduit ont el palais mené,
Mais apreis le deduit furent il tot iré,
Car Charles l’empereres, ki tant avoit bonté,
Monta el faudestueil k’il n’i ot demoré,
Et tenoit .I. verge ; en haut avoit parlé ;
La noise fait laisier ens el palais listé.
« Baron, dist Charlemaignes, [or oies][1] mon pensé.
Tante vile ai conquise et tante fermeté
Et tant chastel brisié et tant bon borc gasté,
Le païs ai conquis environ et en lé
Et tant chevalier mort à mon branc acéré ;
De si as pors d’Espaigne ai jou tot aquité ;
Tuit me servent li prince, li duc et li cassé ;
Esveske et archevesque sunt à moi acliné
De par toute la terre d’environ et de lé,
Et vienent en bataille, quant il i sunt mandé,
A trestot lor esfors, sens point de fauseté,
Ne mais Bues d’Aigremont o le grenon meslé,
Qui por l’amor Doon m’a si cueilli en hé.
Ne me daigne servir, çou est la vérité,
- ↑ 28. De or oies il n’y a que es de lisible. Complété d’après B C.