Baron, oies chançon de bien enluminée ;
Onques par jogleeur ne fa meillor chantée.[1]
Ce fu par .i. matin que l’aube fu crevée,[2]
Que li fiux Charlemaigne à la barbe meslée
S’en entra en la sale menuement pavée.
Là vit il mainte gent qui i fu asemblée.
De bone baronie fu la maison pueplée ;[3]
Chascuns à son costé avoit çainte l’espée,
Tant k’orront del mesage la verité provée
Et comment la parole sera bien achievée.
Loihiers passa avant, à la chiere membrée,
Et sa gent apres lui sans nule demorée.
Oies qu’il dist au duo d’Aigremont la contrée
Devant sa baronie qui là fu aünée.
« Cil Dame Dex de gloire qui [fist] pluie et gelée[4]
Et le chaut et le froit, ciel, terre, mer salée,
Et si fist home et fame par sa bone pensée,
Il saut et gart Charlon de la terre honorée
Et toute sa maisnie qui preus est et senée ;
Et confunde duc Buef où de bien n’a denrée,
Et sa chevalerie que ci voi assemblée.
Chascuns a çaint le branc por commencier meslée,
Mais ases en auront, ains que soit la vesprée.
Ses que te mande Charles de France l’onorée ?
Que le voises servir sens nule demorée,
A la Natevité, n’i a plus d’arestée,
O toi .cccc. homes de maisnie privée.
Et se tu ce ne fais, sa barbe en a jurée
K’il mendera François et sa gent ordenée.
Il ne remanra home dusk’ à la mer salée
Que il n’amaint sor toi, s’il puet porter espée.
Ta cité abatra et ceste tor quarrée
Et s’il te puet tenir, ta mort sera jurée.
En haut seras pendus à une arbre ramée[5]
Page:Castets - La Chanson des quatre fils Aymon, 1909.djvu/301
Cette page a été validée par deux contributeurs.
289
les quatre fils aymon
