Ja par duel demener ne l’ara recovré.
En la sale est venus, là où sot son barné ;[1]
Molt i furent demaine, prince, conte, chassé.
Charles, nostre empereres[2], les a araisoné.
« Baron, dist Charlemaignes, or oies mon pensé.
J’ai portée corone, .lx. ans sunt passé[3].
Onques mais ne trovai, moi feïst[4] tel vilté
Com dus Bues d’Aigremont ki m’a Loihier tué
Et Enguerran ausi, le vasal aduré.
Ja iestes vos mi home et plevi et juré ;
Ne me deves faillir, baron, c’est verité.
Je m’en irai sor lui à cest premier esté
Et menrai mon empire quant l’aurai aüné.
Par ceste moie barbe de blanc entremeslé,
Aigremont abatrai, se je vif par aé.
M’aideres vos, baron, por amor Dame Dé,
Tant que soie vengiés del traïtor prové ? »
Flamenc et Berruier se sunt entre escrié,
Engevin et Normant, dont il i ot planté,
Et tot li autre prince ki furent asemblé ;
Si respondent au roi : « A vostre volenté.
Ja jor ne vos faudron en trestot nostre aé,
Ençois vos aiderons, tant qu’il sera maté,
Et ke vos l’aures mis en vostre fermeté. »
Mais ençois en seront .c. mil home versé
Et cheü .c. destrier, mort et esbouelé,
Tant chastel abatu et tant borc embrasé,
Et tant pié et tant poing et tant bu desevré,
Tant vaillant chevalier parmi le cors navré,
Que il ait pris Buevon, car molt avoit bonté.
« Baron, dist Charlemaignes, à moi en entendes ;
Aideres me vos donc en foi, en loiautés ? »
« Oïl, dirent li prince, mar vos en douteres.
Mais semones vos homes, vos princes, vos chasés,
Que il wiengnent à vos, que mestier en aves.
