Et cil monte et cheval, que plus n’i atendi ;
Tost et isnellement d’Aigremont se parti
Et trespasse les tertres, les valées ausi
Et la terre environ, onques ne s’alenti,
Tant qu’il vit Rossillon, le chastel bien basti.[1]
Cil vint à Rossillon qui fu le duc Girart,[2]
Et le trova jeuant à .i. vasal[3] Lombart.
Li mes est descendus et venus cele part
Et salue le duc, ne se fist point coart.[4]
« Dame Dex vos saut, sire, dist li mes à Girart,
De par Buef d’Aigremont, vo frere le gaillart. »
Apres si li bailla le brief à une part.[5]
Li dus reçoit le brief que ses frère envoia ;
Son chapelain apele, onques ne se tarja ;
Cil brisa le sael et la letre avisa,
Puis si a dit au duc quanque il i trouva :
Com Charles l’empereres son grant ost aüna
Et com Bues d’Aigremont à besoig le manda[6] ;
Que il li viengne aidier por Deu qui le forma ;
Que se li rois le tient, maintenant le pendra.
Comme Girars l’oï, errament se leva[7]
Et jure Dame Deu qui le mont estora,[8]
Qu’il mandera son ost[9], son frere secorra ;
S’il trueve Charlemaigne, à lui se combatra.
Dont mende son empire et molt tost l’aüna ;
Et furent bien .c. m., ce dist cis ques esma ;[10]
- ↑ 1042 BC Et vient à Rosseillon à un jour avespri.
- ↑ 1043 BC le viel.
- ↑ 1044 LC vassal. B varllet.
- ↑ 1046 BC de Dieu l’esperital.
- ↑ 1049 BC Le brief li a baillé, ne fu mie coart. Après ce vers B ajoute : Atant laissa ester le ju li dus Gerart.
- ↑ 1055 B secors li demanda. C à secours li manda.
- ↑ 1056-1058 Ces trois vers manquent à B.
- ↑ 1059 B qui tout le mont forma. C qui le monde forma.
- ↑ 1060 B sa gent. C ses os.
- ↑ 1063 C furent .ccc.m qui bien les esprisa. B insiste : Quant il furent venu, que tres bien les conta, A .ccc.m. homme le nombre en devisa. Il ajoute encore : Et Aimes de Dordonne ne s’y arresta pas, ce qui est d’ailleurs conforme à ce que l’on voit dans la suite.
