Qu’il les eüst ocis ou bruïs en charbon,
Que puis li fissent ire et grande marison
Et destruissent sa terre entor et environ,
Et Charles les chaça del païs à bandon,
Et cil laiserent France, qui qu’en poist ne qui non,
Et fermerent chastel, sens le seü Charlon,
Desus Muese en Ardane, en molt haut liu et bon.
Là les suï li rois à coite d’esperon
Et les chaça d’illuec el regne de Gascon ;
Ses retint en sodées li riches rois Yon.
Huimais orres chanter d’une bone chançon ;
Onques meillor n’oïtes, por voir le vos disson.
« Renaus, dist Charlemaignes, molt as gente façon.
Et non de Dame Deu chevalier te feron
Au matin, parson l’aube, tantost com jor verron. »
Au matin, parson l’aube, quant li jors parut cler,
Charles nostre empereres, s’estoit pris à lever ;
Chauça soi et vesti comme jantis et ber
Et en vint à la sale, mais n’i trova son per.
Là furent roi et conte, li demaine et li per ;
Esveskes et abés i poïssies trover.
Renaut le fil Aimon a pris à apeler.
« Vasaus, dist Charlemaignes, vos estuet adober. »
Il demanda l’auberc qui fu luisans et cler,
Et Renaus le vesti, qui fu gentis et ber.
Charles li laça l’iaume qui molt fist à loer ;
Ogiers li çaint l’espée, qui l’ama sens fauser,
Et Naimes l’esperon, qui tant fist à doter ;
La colée li done rois Salemons, li ber.
« Or tien, ce dist li rois, Jhesus te puist salver !
Dame Dex te consaut, qui tot a à garder !
Garde envers ton seignor ne weilles meserrer. »
Et Renaus li respont. « Dex m’i laist si ovrer,
Que jel doive servir et il me puist amer. »
Chevaliers fu Renaus issi com vos oes ;
.i. cheval li amainent qui tos estoit faés ;
Baiars avoit à nom, issi fu apelés.
La sele li fu misse et li poitraus fermés.