Aalars et Guichars sens nule arestisson
Et Richars li menor, ki ot cuer de lion ;
Il sunt venu sor Saine trestot droit, d’un randon.
Là furent assemblé François et Borgoignon
Et Norment et Poihier et Flamenc et Breton.
Charles prist par la main Renaut le fil Aimon.
« Vasaus, et car jostes, nos vos en semonon ;
Feres en la quintaine, si que nos le veom. »
Et cil a respondu : « A Deu beneïçon. »
Asses i ont feru et Norment et Breton ;
Mais ne l’ont empirie la monte d’un boton.
Atant s’est eslaisiés Renaus, li fiuz Aimon,
Et a brocié Baiart qui li cort de randon,
Et a brandi l’espié qui fu agus enson,
Et fiert en la quintaine par tel devision
Que l’escu a percié et l’estache deront ;
De la terre esracha, tot voiant maint baron,
Tot abat en .i. mont Renaus, cil de Dordon.
Quant le vit Charlemaignes, molt par lui sembla bon.
« Renaus, dist l’empereres, molt esteres preudon.
Onques mieudres de vos ne chauça d’esperon.
Seneschal vos ferai de ma grant region. »
« Vostre merci, biaus sire, dist Renaus, li frans hom,
Et je vos servirai en foi et sens tençon. »
La quintaine fu fraite et li gius est faillis ;
Renaus, li fiuz Aimon, i ot grant los conquis
Et Aalars ausi et Guichars li marchis
Et Richars, tos li menres, qui estoit de grant pris.
Charles nostre empereres est arriere vertis ;
Dusk’ al maistre palais ne s’i est alentis ;
O lui mena Aymon et tos ses .iiii. fis.
Molt fu grande la feste el palais seignoris.
Li rois i done asses et du vair et du gris,
Et Aymes de Dordon palefrois et roncins,
Et Renaus garnemens riches et de grans pris.
Molt par i fu loés de grans et de petis.
Grant joie en fait li rois[1] Charles de Saint Denis,
- ↑ 1892 Ms. l’empereres.
