Por l’amor de lor pere et de lor bons amis.
En la cort en ont maint, de ce soies tos fis,
Dont il mestier auront, ains que past li tiers dis.
Ce fu à lendemain que jors fa esclarcis,
Que Charles tint sa cort, l’emperere au fier vis ;
Del vin servi Renaus et Aalars li marchis,[1]
Guichars porta le pain et li preus Richardins.
Molt furent bien servi li chevalier de pris ;
Chars ont et venoisons et cers de graisse pris
Et piment et claré ont asses à estris ;
Tuit beneïssent Charle, le roi de Saint Denis,
Car pieça mais ne furent nul jor si bien assis.
Et quant orent mengié li chevalier proisié,
Des tables sunt levé, quant il orent mengié,
Et vont parmi la sale, si se sunt envoisié.
Asses i ot deduis où sunt esbanié ;
Mais apres la grant joie furent trestot irié ;
As esches vont jouer où se sunt delitié.
Renaus et Bertolais ne s’i sunt delaié.[2]
Il giuent as eschés sor le marbre entaillié
Et tant i ont joé que puis se sunt irié ;
Bertolais se corroce, si s’estoit marvoié,
Et a clamé Renaut fel cuivert renoié ;
Une bufe li done, li sans est espandié.
Comme Renaus le vit, si s’en est correcié,
Molt s’en failli petit qu’i ne l’a empirié.
Il vint à Charlemaigne, si li chaï au pié :
« Merci, sire empereres, de moi aies pitié.
Vostre niés m’a feru, si que je ai saignié.
De lui me faites droit, empereres proisié. »
Comme Charles l’oï, si en fu molt irié ;
Malvais garçon, coart avoit Renaut hucié.
Quant Renaus entendi, Charles le laidoia
Et que malvais garçon, oiant tos, l’apela :
