Ains de lui saluer ne volrent travaillier.
Naimes l’a apelé qui molt fist à proisier.
« Renaus, li fius Aimon, lai ester le noisier.[1]
Le mesage Charlon te vodrion noncier.
Venus est vo chastel gaster et essillier,
Et se il vos puet prendre, fera vos escorcier.
Envoies li Guichart que vos aves tant cier.
Li rois le fera pendre ou en l’eve noier »
« Naimes, ce dist Renaus, laisies vostre plaidier,
Que par la foi que doi au baron saint Richier,
Se tant ne vos amasse entre vos et Ogier,
Je vos feïsse ja tous les membres trancier.
Guichars n’est mie pris ; laisies vo menacier.
Ains aura l’emperere d’amis molt grant mestier,
Que il puis[t][2] nul de nos de noiant damagier.
Ales vos ent arriere, bien li poes noncier :
Por lui ne ferions la monte d’un denier. »
Li dus Naimes s’entorne entre lui et Ogier ;
Desi à Charlemaigne ne se voldrent targier.
Le mesage li rendent li baron chevalier,
Ce que Renaus manda ne volrent pas laisier,
L’empereres l’entent, le sens cuide [changier].[3]
Or est li empereres à Montessor venus ;
Devant la maistre porte est a pié descendus.
Il n’i ot que .iii. portes où sieges fu tenus :
A l’une fu quens Guis et Naimes li chenus[4]
Et li quens de Nevers et dans Ogiers, ses drus,[5]
Et li dus de Borgoigne ne s’est mie esperdus ;
A la tierce des portes est à pié descendus[6]
Et tot li Hurepois ; nus n’i est remasus.
Là ont tant paveillons et tant bons tres tendus.
- ↑ 2215 Michelant [Renaus]. L’initiale de Renaus est au texte, au dessus de li rois qui est exponctué.
- ↑ 2227 L puis. A B puist.
- ↑ 2234 L ghangier.
- ↑ 2238 B et Fouques li quenus.
- ↑ 2239 B Et li roys de Navare et Ogiers li membrus.
- ↑ 2241 B En la .ii.eme porte. — B ajoute un vers : Et à la tierche porte est .n. li barbus.