Tant pumel et tant aigles à cercles d’or battus.
De cele part iert bien li sieges maintenus.
Devant l’empereor fu Aimes, li chanus ;[1]
Por guerroier ses fis est illuec remasus,
Ne s’en partira mais, ses aura irascus.
Renaus est preus et sages et chevaliers membrus.
Il a laiens ses homes, ses amis et ses drus ;
Si ont haubers et hiaumes et lances et escus
Et bons destriers d’Arrabe auferrans et quernus.
Tant ont de lor aviaus, qu’en diroie je plus ?
Bien iert au tref le roi li esfors maintenus.
Montessor fu asis par merveillos bofois.
Dex ! com fu grans li pueples k’i amena li rois !
Asses i ot Normans et Bretons et Tiois,
François et Borgoignons et Flamens et Norois ;
Mais de çou fist Renaus que preus et que cortois,
Que de ceus del chastel lor fu fais .i. defois.
Cachier vont es fores, el bos et el marois,
As senglers et as cers et as ours demanois,
Et peschent es rivieres, es viviers et es dois ;
Mengüent venoisons et riches braons frois
Et boivent les bons vins ; meillor n’ot quens ne rois.[2]
Sovent vont en riviere desor les palefrois,
Portent faucons mués et estors vienois[3]
Dont prenent les oisiaus à merveilleus esplois.
Renaus en apela Soïn de Vienois :[4]
Venus iert en sodées et des suens .c. et trois.
Il li dist en riant : « Çaiens somes destrois.
Charles nos a asis et il et si François.
Tos nos cuident tolir ça dedans nos conrois.
Il a mandé Guichart, mais ne l’aura des mois ;
Ne li envoieroie por trestot Orlenois. »
Vers le vallet s’abaise, sel baisa une fois.
« Guichars, je vos aim molt, certes et ce est drois ;
Ne vos rendroie à Charle por tot l’or as Danois.