[1]
Ja n’auromes del vostre la monte d’un espi,
Et à vos herités avons del tot failli.
Cest chastel avons fait, si vos en poise si,
Entre vos et Charlon, le fort roi poesti,
Ki ci m’a asegié et il et si ami.
Ja ne me deüssies tenir por anemi ;
No mere nos desirre, qui soef nos norri.
Onques de son corage ne fumes jor ahi ;
Mais, par la foi que doi saint Thomas que je pri,
Je vos donrai .i. cop de mon espié forbi. »
As contraires vint Charles, s’amena Aymeri
Et Naimon le Baiver et le conte Henri,
Fouque de Moreillon que Renaus haoit si ;
L’autre an ocist son oncle[2] au branc d’acier forbi.
Charlemaignes i maine et Richier et Gondri
Et tel .c. chevaliers qui sunt preu et ardi.
Ja sera li tornois, bien en sunt aasti.
Des compaignons le roi virent sevrer Tieri ;
Cil fu tres bien armés sor Blanchart l’arrabi.
Li baron vont encontre parmi le pré flori,
Et Tieris point et broche le bon destrier braidi.
Del premier cop avoir ne s’est mis en obli
Et va ferir Richart, ne l’a pas meschoisi.
Et Richars feri lui, qui ot le cuer hardi,
Que escus ne haubers ne l’a pas garenti.
El cors li mist la lance e tot, l’acier forbi ;
Le cuer qu’il ot el ventre, li a en .ii. parti ;
Tant com hante li dure del cheval l’abati.
Quant Tieris fu cheüs, à terre s’estendi ;
Ains ne pot clamer coupe ne prier Deu merci.
L’empereres le voit, s’en ot le cuer mari ;
Il a dit as François : « Nos somes mal baili.
Page:Castets - La Chanson des quatre fils Aymon, 1909.djvu/361
Apparence
Cette page a été validée par deux contributeurs.
349
les quatre fils aymon