« Sire, ce dist li dus, bien vos ai escouté.
De vos doner conseil ne voi nul apresté.
Cuidies vos que li conte soient si enserré
Que il n’aient laiens molt de lor volenté ? »[1]
Apres parla Hervix, de Losenne fu né :
« Sire, drois emperere, molt vos voi mal sené,
Que vostre empire tot aves ci assemblé.
S’or venoit une gent de cel autre reiné,
Ki entrassent en France par vive poesté,
Molt vias en seroient vostre chastel pueplé.
Mais faites une chosse, se il vos est loé.
Dones moi le chastel et toute l’ireté
Et seulement .v. liues environ le reiné ;
Je vos rendrai Renaut ançois [.iii. jors] passé. »[2]
Hervix, dist li rois Charles, molt aves bien parlé.
Se vos içou me faites que aves devisé,
Le chastel aures vos, ja n’en iert trestorné.
Si vos donrai owec Loon, ma fort cité. »
Hervix en a le roi durement afermé
Qu’il li rendra Renaut, ains quart jor ajorné ;
Mais molt mauvaisement l’a Charles averé.[3]
Les fiances sunt faites devant l’empereor
Qu’il li rendra Renaut, ains que past le quart jor.
« Ne vos aseüres, ce dist li souduitor,
Le matin, parson l’aube, prendrois vostre oriflor.
A Guion de Bourgoigne le chargies par amor
Et tex .c. chevaliers qui soient de vigor.
Par cel pui les conduie, com hom plains de valor ;
Gardes n’i ait mené ne noise ne tabor.
El chastel les metrai à l’esclarcir del jor. »
« Volentiers, » ce dist Charles, li bon empereor.[4]
- ↑ 2559 M donne un vers de plus : Qu’il n’aillent en riviere et en bois et n pré Et qu’il n’aient.
- ↑ 2569 Sic A. L .viii. passé. M dedens .i. mois.
- ↑ 2574-2576 A Hervis en a le doi ancontremont levé qu’il li rendra Regnaut ains le tier jor passé, Mais mont malvaisement l’en a asseüré. — M Hervix en a le doi encontrement levé, Mais moult mauvaisement l’a Charles enerré, Quer ainchies sera ars et la poudre venté.
- ↑ 2586 M le maine empereour.
