En molt malvais, endroit me sunt cist plait meü.
Molt sunt vo fil preudome, mais cier me l’ont vendu.
Or seront à ces festes mi concile tenu ;
Si prendrai mon conseil ce fait qui là fu.
Tuit series destruit, se j’en iere creü. »
Aymes a bien del roi le respons entendu ;
Forment l’en a pesé qui à cort fu venu.
Isnellement s’en torne et avec lui si dru,
Qu’il n’a de Charlemaigne le congié atendu.
Es chevaus sunt monté, n’i font noise ne hu ;
Entresi à Dordone ne se sunt arestu.
Aymes descent à pié desous le pin ramu ;
Por la parole Charle fu li viols irascu.
A poi qu’il n’ot au roi son homage rendu.
« Sire, ce dist dame Aye, com vos est avenu ? »
« Dame, ce dist li dus, mon servisse ai perdu.
Je forjurai mes fils por Charlon le chenu.
Or ai Renaut en champ et ses homes vaincu.
Molt se desfendi bien, onques tex ber ne fu.
Hermenfrois le feri de l’espié sor l’escu,
Mais Renaus, mes bon fils, li ot molt tost rendu.
A tout son aisné frere, l’ot si grant cop feru
Que l’escu li perça, li haubers fu rompu.
Tres parmi le cuer outre li mist l’espié molu ;
Del cheval l’abati mort à terre estendu.
Aallart, vostre fil, ot le cheval rendu. »
« Sire, ce dist la dame, i a nul retenu ? »
« Nenil, ce dist li dus, car ne plot à Ihesu ;
Mais il sunt desconfit, forment il ont perdu,
Molt malvais guerredon m’en a Charles rendu.
Par molt grant maltalent somes de cort venu,
Mais se n’iert por pechié, jel feroie irascu. »
Or est Aymes del roi par maltalant sevrés,
Et Renaus et si frere ont les destrois passés.
En la parfonde Ardane es les vos tos entrés ;[1]
- ↑ 3195 Le séjour des fils Aymon dans l’Ardenne est très longuement développé dans B C. Il y comprend 297 vers, tandis que dans L il n’en a que 121. À la reproduction souvent inexacte de L sont mêlés des passages de
