Le matin s’en iront par son l’aube aparant.
Ne sai ses verrai mais en trestot mon vivant. »
Quant li dus l’entendi, tos taint de maltalent ;
A ses fius se torna, molt lor fist fier samblant.
Il les a apelés moit aïréement.
« Enfant, ce dist li dus, vos soies mal veignant.
Que quesistes à moi ? ne vos sui bien weillant.
Forjuré vos ai Charle, l’empereor poissant,
Que la guerre feïstes, malvais gar[ç]on faillant.
Je ne vos pris trestos la monte d’un besant.
Ne troves vos convers, chevalier ne sergent,[1]
Dont preignies raençon ne d’or fin ne d’argent ? »
« En la moie foi, sire, ce dist Renaus l’enfant,
Se vos marches sunt quites, par le mien essiant,
Ce ne sunt pas les autres, ce vos di voirement.
Jusk’à .l. liues poes aler errant,
Ja n’i troveroit home borgois ne païsant,
Fors ceus qui es chastiaus se vont eschergaitant.
L’autre an, ens es Espaus, me feïstes mal tant ;
Mon chastel abatites, dont j’ai le cuer dolant,
Entre vos et Charlon qui le poil a ferrant.
Apres me revenistes laidement enchauçant ;
Tous nos desconfisistes deles .i. desrubant ;
De .vii.c. chevalier ne furent eschapant
Ne mais ces .iii. barons que ci vees seant.
Por nos perdres Jhesu, le roi de Belleant. »
Quant Aymes l’entendi, si en va sospirant.
Or sunt li .iiii. frere el palais de Dordon ;
Entr’aus et lor bon pere commence la tençon.
Li viellars les a mis fierement à raison :
« Valles, cil vos confonde qui sofri passion.
Que quesistes vers moi, quant bien ne vos feron ?
Je no vos pris tot .iiii. waillant .i. esperon.
Noirs et velus vos voi, bien resambles, gaignon.
Quel guerre faites vos l’empereor Charlon ?
Ne troves en sa terre, dont praignies raençon,
Chevalier ne sergent, dont aies garison ?
N’estes pas chevalier, ençois estes garçon.
Ja troves vos asses gent de religion,
Clers et prestres et moines de grant aaïson,
- ↑ 3480 M ne marcheant, Clerc ne prestre ne moigne ne chevalier vaillant
