En clair saïm lor gissent li foie et li poumon
Et si ont les chars tendres, si ont gras le roignon ;
Mioldres sunt à mengier que cisne ne poon.
Brisies les abaïes et froisies à bandon.
Ki del sien vos donra, si li faites pardon,
Et qui nel voldra faire, mar aura raençon.
Cuisies les et mengies en feu et en charbon ;
Ja ne vos feront mal niant plus que venison.
Dame Dex me confonde, qui vint a passion,
Se ençois nes mengoie que de fain morusom.
Miodres est moine en rost que n’est car de mouton.
Issies fors de ma sale, widies moi mon donjon ;
Car ja n’aures del mien, vaillant .i. esperon. »
« Sire, ce dist Renaus, vos dites que maus hom.
Tant en avons ocis, le conte n’en savom.
Ja Dame Deu ne place que noaus en façon.
A chacier nos aidies owec le roi Karlon
Et si nos desertes com soiomes larrom.
Mais or avons tant fait que somes en maison.
Vos le comperres chier, ains que nos en parton. »
Quant Renaus li cortois ot son pere parler,
De maltalent et d’ire commence à tressuer ;
Se ce fust .i. autre hom, nel peüst endurer ;
Ja li fesist molt tost le chief del bu sevrer.
Il a prise s’espée sovent à regarder ;
L’une moitié en trait, sor piés se vost lever.
Aalars le conut, quant il le vit muer ;
Devers lui se torna, sel prist à apeler :
« Por amor Deu, biau sire, tot çou laisies ester,
Car au bien et au mal doit on son pere amer.
Nos ne devomes mie encontre lui chosser.
S’il a fait sa folie, nos l’estuet endurer. »
« Baron, ce dist Renaus, bien puis [je] forsener[1]
Quant je voi ci celui qui nos deüst garder
Et encontre tous homes maintenir et tenser
Et au bien et au mal le bon conseil doner.
- ↑ 3543 L bien bien puis.