S’a veü Montalban ki molt fait à proisier.
« Hé Dex, dist l’emperere, ki le mont doit jugier !
Or voi là .i. castiel molt orguelloz et fier.
Li rois Yus l’i a fait novelement drechi[e]r.[1]
Bien sanble estre en tel liu k’il volle guerroier. »
Un vassal en apelle, del païs chevalier ;
Cil li conta tel cose ki bien peüst laissier,
Car lui et plusors autres en fist puis travellier.
L’emperere de France fu molt preus et senés
Qant il voit Montalban, molt en est trepensés.
Un chevalier apele, ki del païs ert [nés].[2]
« Amis, dist l’emperere, envers moi entendes.
Com a non cil castiels ? gardes ne me celes.
« Par foi, Montalban, sire, issi est apelés. »
« Or me dites, biax sire, k’en est sire, clamés ? »
« Par foi, sire, Renaus, uns hom deserités,
Entre lui et ses freres ki preus sont et senés.
En la cit de Dordon fu li cuens Renaus nés,
[Aalars et Guichars et Richars li mains nés] ;[3]
L’emperere les a fors del regne getés.
A cest roi sont venu [kes] tient en grant cierté.[4]
Renaus a sa seror, molt est bien mariés. »[5]
Quant Charles l’entend[i], si s’en est enclinés.[6]
[Il apela ses homes, ses a araisonnés.]
« Baron, dist l’enperere, envers moi entendes.
Jo ai mes enemis en cest païs trovés.
Sire Ogier, dist li rois, car vos en aprestes ;
Car me queres Yon tant que il soit trovés.
De moie part li dites, gardes ne li [celes],[7]
Mes enemis me rende que il a recetés ;
Si me face cargier .c. chevaliers armés,
Tant ques puisse conduire dedens mes herités.
- ↑ 4348 L drechir. M Le roi Ys de Gascongne l’a fet novel drechier.
- ↑ 4355 L ens. M fu nés.
- ↑ 4363 L Riciars et All et Guichart li mainé. M Aalart et Guichart li mains nés. Metz : Et Richars et Guichars et Aalars l’ains nés.
- ↑ 4365 L k’il. A. qui mont les a amez.
- ↑ 4367 L entende. M entendi.
- ↑ 4368 Sic M Metz. Manque à L.
- ↑ 4373 L li ces.
