Lor fu à Montalban la novele mandée.
Quant si frere l’entendent, molt forment lor agrée
Molt fu bien porpendue la grant sale pavé[e][1]
De jons et de mentastre, de rose enluminée,
Et montent es cevax, sans nule demorée.
Renaus i vint encontre, qant une eve ont passée.
[Le] jor fu [as destriers], la grant plaine livrée,
A tornoiement jostent, n’i ont autre mellée ;
Vindrent à Montalban qant none fu sonée.
Molt furent grans les noces en la sale pavée ;
Ains n’i ot jogleor n’eüst bone sodée,
Ou mantel var et gris ou grant cape fourée.
.viii. jors lor a duré cele feste honorée.
Li rois Yus s’en repaire, à la ciere menbrée,
Et Renaus le convoie une molt grant loée ;
A Deu le commanda, qui fist ciel et rosé[e].[2]
Reignaus, li fix Aymon, a prise sa mollier ;
Si frere en orent joie et tuit si chevalier ;
Il n’en ot en Gascoigne nis .i. baron tant fier,
Se il forfist le roi vallisant un denier,
Que Renaus nel fesist à sa merci paier.
[Molt le heent] forment de la teste à trencier ;
Mais or li croist tel cose dont plus pue[t][3] enpirier.
Charles va en Galisse por saint Jaque proier ;
Ensamble o lui mena le bon Danois Ogier
Et Oton de Police et Naimlon le Baivier.
Lor furent tot torsé li mul et li somier ;
Li rois en est entrés en son cemin plenier
Et trespasse la tiere, ne se velt atargier.
Des jornées k’il fist ne vos sai acointier ;
Venus est à Saint Jaque, s’est entrés el mostier ;
Desor le mestre autel a mis .i. marc d’ormier.
Qant ot fait s’orison, mist soi el repairier ;
En son cemin entra, pense de l’esploitier ;
A Bordiax est venus par desoz le rocier.
L’emperere regarde desoz .i. olivier ;
