Car il va en tel liu où est cueillis en hé.
Se Charles le savoit, le chief aroit copé.
Or dirons de Charlon le fort roi coronné,
Qui apela Naymon et Ogier l’aduré ;
Forcon de Morillon n’i a pas oblié.
« Signor, ce dit li rois, or oies mon pancé.
Prenez .c. chevaliers qui soient bien armez.
Tout le chemin d’Orliens vous pri que vous aliez,
Et gardez nus n’i passe que son nom ne saichiez.
Mont me crien de Regnaut qui tant est sorquidez.
Por Dieu vous pri, signors, si chier com vous m’avez
Se vous le troviens, qu’il me soit amenez. »
« Sire, dient li conte, si com vous commendes. »
.c. chevaliers ont pris qui sont preux et senez.
De Paris s’en issirent sur les chevax armez.
Demie lieue errerent, puis se sont arestés.
Mont longuement i furent que nus n’i est passez.
La rosée fu froide qui mont les a grevez ;
Puis leva le solois qui mont les a chaufez.
Naimes parla premier, s’a Ogier apelé.
« Ogier, ce dist li dus, or oiez mon pancé.
Charlemaignes de France nous tient en grant vilté
Qui nous fait ci gaster de froit et de lasté.
De grant ribauderie nous a araisonné. »
« Par foi, ce dit Ogiers, vous dites verité.
Qui plus i demorra, honis soit il de Dé. »
Ja fussent à Paris arriere retornez,
Quant Naimes se regarde, s’a les conte avisé.
A Ogier les monstra et à l’autre barné.
Quant Forques les choisi, si s’est haut escriez :
« Or avons nous Regnaut mien esciant trové. »
« Par foi, ce dit dus Naimes, vous dites verité.
Bien resamble Baiart cest destrier sejorné,
Mez d’autre color est, mont le voi deguisé. »
Forques a trait l’espée, si est avent alé.
Ja en eüst Regnaut le chief du bu sevré,
Quant il le resgarda, si l’a bien avisé ;
Bien voit ce n’est il pas, si s’en est retornez,
Et li dui baron errent, ne sont pas aresté.
Naimes ala encontre, s’a Maugis apelé.
Par le frain l’a saisi, si li a demandé :
« Sire, com aves nom et dont estez vous né ? »
Et Maugis respondi : « Ja en orres verté.
Je suis né de Poiteu, si ai nom Joserez. »
« Amis, ce dist dus Naimes, or me di verité.
Sez moi dire novelle de Regnaut l’aduré,