« Certes, ce dist Renaus, bien fait à otroier. »
Droit vers Monleheri pensent de [chevauchier].[1]
Guichars et Richars erent desos un olivier
Et gardent devant els parmi .i. pui plenier,
Et voient endroit els les [contes aproismier].[2]
Aallart, lor aisné, pristrent à araisnier.
« Frere, bien nos devons, dist Guichars, desbucier.
Par le mien entientre, ce sunt là chevalier
Qui vienent de Paris, del cors grant et plenier. »
« Hé Dex ! dist Aallars, ki le mont dois jugier,
Ja voi jo là Renaut et Aumaugis le fier.[3]
Ne sai se l’on [les] cace, mais n’ont soing d’atargier.[4]
Montes, cascuns de vos, sor son corant destrier.
S’il ont mestier de nos, si lor iron aidier. »
Et cil li respondirent : « Bien fait à otroier. »
A icestes paroles se vont aparelier ;
Cascuns vest en son dos son bon auberc doblier
Et mistrent en lor ciés lor ver haumes d’acier
Et çaignent lor espées à lor flans senetrier.
Puis est cascun montés sor le corant destrier
Et ont pris lor espiel as hantes de pumier.
Ja socoront Renaut, se il en a mestier.
Atant es le baron, si commence à hucier :
« Barons, ales vos ent, penses de l’esploitier,
Savoir s’à Montalban poriens repairier.
Vees ci la corone Charlemaigne au vis fier.
Tenes vo droit chemin, n’aies soing d’atargier.
Jo enport la corone, se Dex m’en velt aidier,
Et il me velt sauver Baiart, mon bon destrier. »
Quant l’entent Aallar si le cort enbrachier ;
.iiii. fois le baisa ains qu’il vosist laissier.
« Frere, dist Aallars, Dex te gart d’encombrier. »
Baiars estoit plus blans que n’est flor d’olivier,
Et li Maugis est noirs com more de morier.
Li uns aloit lés l’autre, serrer font et rengier ;
Page:Castets - La Chanson des quatre fils Aymon, 1909.djvu/448
Le texte de cette page a été corrigé et est conforme au fac-similé.
420
les quatre fils aymon