Merci Deu et Baiart, bien m’i est avenu.
Plus de .xx.m. destriers i a Baiart vencu.
J’en aport la corone Charlon, le viel canu.
Ne vosist por Orliens, ce lui fust avenu.
Quant li baron l’entendent, [grant] joie en ont eü.[1]
Atant es la contesse, s’ot .i. pale vestu ;
Desor ot afublé un mantel de bofu ;[2]
Ses crins ot galonés à un fil d’or batu ;
Et vait baisier Renaut, son ami et son dru ;
Puis montent el palais, n’i ont plus atendu.
Reignaus, li fix Aymon, fu molt joians et liés.
A Montalban [estoit] à joie repairiés ;[3]
Mais or li croist tel cose dont molt sera iriés,
[Et sa gent tormentée et il molt travilliés],[4]
Montalban abatus et li mur peçoiés,
Et son païs tot ars, destruit et escilliés.
Charles fu à Paris, dolens et coreciés ;
Il vint à ses barons, si les a araisniés.
« Segnor, dist l’emperere, por Deu, me consellies
Des fix le viel Aymon dont jo sui vergoigniés.
Ma corone ai perdue dont jo sui avilliés.
Certes se ne l[a] rai, jamais ne serai liés.[5]
Li lechieres me dist, l’ors en seroit brisiés
Et li ciers [escarboucles] sus son palais ficiés. »[6]
« Sire, ce dist Rollans, por coi vos esmaies ?
Nos iromes à l’ost, si sera asegiés.
Li rois Yus de Gascoigne de cui il tient ses fiés,
Sera pendus à forces, s’il puet estre ballies. »
« Biaus niés, dist l’emperere, forment me rehaities. »
L’emperere de France fu molt grains et maris
Et li autre baron n’i [ont] ne jiu ne ris.
« Sire, ce dist dus Naymes, de ce soies tos fis[7]